Избори за Македонија, или за нејзиниот крај

 

И така протестите За заедничка Македонија и нивните „лидери“ се трансформираа во „Избори“ за Македонија! Не знам за други ама мене ваквата трансформации ниту малку не ме изненади, од проста причина бидејќи „нивната спонтаност“ на овие, како што беше онаа на „Шарените“ од минатата година, е креирана, финансирана и водена од комуникациските центри на одредени политички субјекти. Можеби поттикнати од фактот дека и „шарените“ бараа избори, а по 11 декември некои од лидерите станаа пратеници, сега овие од Заедничка Македонија или „црвено-жолти“, исто така бараат избори додека таканаречената „тиранска платформа“ веќе е надмината. Како и да е,  ние и како држава и како општество влегуваме во уште подлабока криза. Некои пак не убедуваат дека ова е финалето на кризата и дека новото парламентарно мнозинство на чело со СДСМ и двоецот Заев-Шекеринска, како што самите велат „во еден разумен рок“ ќе направеле влада и работите ќе тргнат (само е прашање во кој правец). Не знам дали приметувате дека по онаа историска констатација на павлихата Иванов „разумен компромис и разумен компромис“ еве сега во нашата фолклорна политичка култура влезе и фразата „во еден разумен рок“. И додека го чекаме тој „разумен рок“ секако ќе му престои „разумен компромис“ ние убедливо тонеме. Фактот дека според последните истражувања 39 проценти од населението трајно би се иселило од државата, понатаму ако 61 проценти од младите од 15 до 24 години трајно би се иселиле мислам дека е најдобар показател каква ни е состојбата во државата и општеството. И уште еден многу индикативен и загрижувачки податок, 15 проценти изјавуваат дека би се иселиле од политички причини. Од друга страна сеуште актуелниот „газда“ во државата и лидер на ВМРО-ДПМНЕ повикува граѓаните да бидат будни и да бидат подготвени да ја бранат сувереноста и унитарноста на државата! Во истовреме во „неговиот“ центар за комуникации на овие тенденции за иселување најдоа исто така „историско објаснување“, дека  се должат на фактот дека со визната либерализација сега лесно се оди во странство и затоа ете нашите граѓани се иселуваат. Само една паралела. Словенечките граѓани од осамостојувањето (1991 год.) имаат целосна визна либерализација како за цела Европа така и за САД, но никогаш немале вакви миграциски текови. Е па сега да побараме Европа пак да ни воведе визи?!Ама да се вратиме на политичката криза. Ајде да се потсетиме, се започна со бомбите. И тогаш Заев не убедуваше дека Груевски многу брзо ќе си замине од политичката сцена. На бомбите одамна заборавивме а Груевски и „фамилијата“ и понатаму владеат. Криминалите на ВМРО-ДПМНЕ кој ги најавуваше Заев како да ги заборавивме ама спин докторите на „фамилијата“ успеа да создадат перцепција за „аболицираниот криминалец Заев“. За неговото национално предавство договорено со нарко-мафијата (читај Албанците) да ја направи Македонија двонационална и да ја федерализира. Навистина се прашувам дали Заев и неговиот тим наивно веруваа дека Груевски и „фамилијата“ лесно ќе се откажат од власта, и од сето тоа што власта им го донесе??. И што сега Заев навистина има формално има коалициско мнозинство од 67 пратеници. Но од она што го гледаме во Собранието изгледа тоа е само на хартија. Имено ДУИ поточно Ахмети кој од 11 декември лани па до денес изгледа најмногу се бави со „анализи“ продолжува да седи како што вели народот „на две столици“. Неговата последна изјава дека ДУИ со давањето на потписи за Заев сториле се и дека сега излезот на кризата го гледа кај СДСМ и ВМРО-ДПМНЕ па затоа ги охрабрува да седнат и да преговараат и најдат секако „разумен компромис“ најблаго речено е политички некоректна. Имено коалицијата, ако е таа искрена налага барем минимум одговорност за состојбите и не завршува само со давање потписи. Патем не го слушнавме Ахмети да каже што се договарал со Груевски што усогласиле а што не. Вака останува изјавата на Иванов дека се било договорено ама некој се јавил и ете Ахмети со тешко срце морал да се повлече. Дали оваа изјава на павлихата Иванов значи дека Ахмети прифатил да не се продолжува мандатот на СЈО? И веќе кога го споменавме пак да прашам. Дали до крајот на нивниот мандата врз основа на материјалите со кои располагаат ќе успеат да најдат барем еден случај во кој се замешани претставници на ДУИ. Во меѓувреме секако случајно и спонтано, над Скопје лета дрон со знаме на Голема Албанија, Еди Рама одвреме навреме дава изјави исто така посредно во корист на таа идеја, па дури и Брисел го опомена дека не е време за вакви изјави кои негативно се рефлектираат врз стабилноста на регионот. Тука секако се и најновите изјави на градоначалникот на Дебар, демек срцата на граѓаните на овој град бијат за Тирана. Не треба голема мудрост и анализирање па да се сфати дека сето ова ниту малку не одговара на Заев и демек коалицијата со албанските партии туку пред сѐ на Груевски и фамилијата. Само видете го соопштението на ВМРО-ДПМНЕ околу овие настани. Во суштина колку состојбите и работите одат надолу тоа ВМРО-ДПМНЕ преку своите спин доктори успешно си го книжи на свое конто. И така повторно сега почнува да се свири на националистичките ноти. Ама бидејќи овде на западен Балкан живеат таканаречени неисториски народи кои ништо не научиле од својата сопствена историја многу лесно нашите политички елити токму со тие националистички ноти обезбедуваат за себе власт. А власта носи пред сѐ бенефити би рекол еден наш бивш премиер кои денеска е богат колку еден просечен македонски тајкун (негови зборови исто така). Е па сега да не нѐ чуди дека над 60 проценти од младите луѓе сакаат карта за заминување во еден правец. А ние кои остануваме тука, е па ние изгледа се навикнавме да си бидеме овци, а овците се стрижат нели!

Тодор Пендаров

п.с браво за гевгеличани за висока еколошка свест и одговорност за својата животна средина. Мисли глобално делувај локално е светското мото на екологистите.

Pascha – Премин – Велигден

 

Овие три збора во суштина значат исто и го одбележуваат еден од најголемите и нај сакралните христијански празници, а тоа е воскресението на Исус. Настан кој за сите христијани претставува победа на животот врз смртта. Ние празникот го одбележавме малку по различно отколку во минатите години. Прво што паѓаше во очи за време на велигденските празници беше засиленото присуство на полицијата, борни коли специјалци, односно на моменти и човек се чувствуваше и малку нелагодно од толку оружје околу него. Но за жал тоа е реалноста во која живееме. Мора да се истакне дека годинава во цела Европа велигденските празници поминаа под засилено полициско обезбедување поради заканите кој доаѓаат од Исламската држава, а посебно по неодамнешниот терористички акт врз верските објекти на Коптите (христијани) во Египет.

Вториот настан кој некако беше цело време присутен барем во медиумите е интервјуто на онаа павлиха (словенечки израз за дворски шут) Иванов дадено за австрискиот весник, Wiener Zeitung“. Со ова интервју оваа персона која навистина е легален претседател на државата уште еднаш потврди дека нема ниту трошка легитимитет. Самото интервју по својата содржина нема ниту интелектуална ниту државничка димензија туку од почетокот па до крај провејува онаа позната фолклорна политичка (не) култура и секако балканскиот инает (не го давам мандатот на Заев) и авторитарност. Но да одиме по ред. Откако го објаснува принципот владата да ја состави победничката партија на македонците со победничката партија на Албанците со што оваа павлиха од државник и понатаму ја форсира етничката поделеност на македонското избирачко тело, Иванов „храбро“ изјавува дека коалицијата помеѓу Груевски и Ахмети била веќе договорена кога „некој“ се јавил по телефон и тогаш Ахмети ја откажал коалицијата со Груевски. На прашање на новинарот кој телефонирал оваа павлиха кој сака да се претстави и како некаков „спасител“ на унитарноста и на македонскиот народ одговара, „вие сте новинар истражете го ова“. Одговор кој покажува тврдокорен континуитет на „разумен компромис е разумен компромис вие како новинар тоа треба да го знаете а не јас да ви објаснувам“ Ама да се вратиме на најновиот „бисер“ на Иванов. Ако е тоа точно дека коалицијата Груевски – Ахмети била во целост договорена ама ете тој „таинствен“ телефонски разговор ја расипал (во Дебармало нашите баби и дедовци велеа „се тури Дебор“) тогаш оваа павлиха му заби „нож во грб“ на Груевски, а богами и на Ахмети. Имено дали тоа значи дека Груевски ја прифатил таканаречената „тиранска платформа“. Понатаму дали т Ахмети некако во стилот „извините нисам одавде“ се согласил да не се продолжил мандатот на СЈО. Понатаму Иванов тврдокорно изјавува дека нема да го даде мандатот на Заев и во пример ако заврши конституирањето на Собранието биде избран претседател на парламентот а со тоа официјализирано парламентарното мнозинство, односно исполнети условите за формирање на нова влада. Иванов оди дотаму да се заканува дека Заев еден ден заради криминал ќе заврши во затвор. Лично досега ама ниту една буква позитивно не сум рекол за господинот Заев ама принципот на презумција на невиноста мора да се почитува дури и од една павлиха која ете е претседател на државата. Како и да се поставува прашањето, еве да речеме во јуни се одржат нови парламентарни избори и повторно ВМРО-ДПМНЕ да не успее да состави влада. Дали и тогаш Иванов само од инает нема да го даде мандатот на СДСМ. Како и да е состојбите во Македонија благодарејќи на нашите лидери и државници а сите можеш да ги ставиш во категорија на балкански фолклорни автократи од ден на ден станува се посериозна и посериозна. Токму затоа сега доаѓа и Карл Билд искусен дипломат кои многу добро ги познава состојбите на Балканот. Според неговиот блог тој ќе се сретне со партиските лидери ама нема да се сретне со Иванов. Но лично не верувам дека Билд нешто ќе смени во позитивна смисла. Мислам дека Европа (Билд во суштина доаѓа како неформален претставник на Брисел) и понатаму е заинтересирана само за безбедноста и стабилноста во регионот, факт е дека Груевски и фамилијата заедно со Ахмети и неговото друштво во изминативе скоро десет години многу успешно ја обезбедуваа стабилноста како дома така и во регионот. Бомбите веќе ги заборавивме, а убеден сум дека Врховниот суд ќе донесе одлука со која материјалите од прислушувањата нема да можат да се користат како доказен материјал со што СЈО тешко ќе може нешто по сериозно да направи. А опозицијата односно СДСМ со двоецот Заев – Шекеринска (патем се прашувам кој на кого му е alter ego) се покажа дека во трката за власт се изгуби и во времето и во просторот. Сепак голем дел од вината ја носиме и ние како поединци и граѓани. Со други зборови сите заедно, граѓани, невладини организации, политички партии, едноставно ја немаме онаа потребна државотворна критична маса. Затоа еве веќе дваесет и шест години од крајот на бившата држава и крајот на еднопартискиот политички систем не можеме ниту како држава ниту како општество ниту како поединци да го направиме потребниот „Премин“ во нешто ново по квалитетно и поубаво. Е па нека ние Господ напомош

Тодор Пендаров

Ича мича и готова прича

 

Ние постарите кои го разбираме некогашниот српскохрватски јазик (денешен српски, хрватски, црногорски, бошњачки) добро се сеќаваме на оваа фраза со која по обичај завршуваа приказните во детските емисии, ама и нашите родители знае да ни ја кажат кога сакаа да ги скратат приказните кои ни ги читаа или раскажуваа. Секако „македонската приказна“ која ете политичките елити ни ја раскажуваат дваесет и шест години парадоксално се одвива во два правца. Едниот кои се однесува на политичките елити по правило секогаш завршува убаво и богато, односно како што изјави еден од по познатите бивши политичари „јас сум богат како просечен македонски бизнисмен“! Абе како се збогати кога прва и единствена работа ти беше пратеник и премиер??? Од друга страна ние обичнатараја“ во овој четврт век на македонската (не)успешни приказни стануваме секој ден посиромашни. Над 30% проценти од населението живеат во сиромаштија, средната класа скоро ја нема. Печалбарството (модерно речено миграција) и тоа во еден правец од ден на ден е се помасовно и станува високо позиционирана вредност, да не речам идеал на младиот човек. Државата во овој транзициски период од година на година се повеќе станува нефункционална. Ама затоа се повеќе имаме партизирана држава, која наместо да ги штити почитува и развива човековите права и слободи, да го спроведува и надоградува владеењето на правото таа се повеќе станува заробена држава со целосна контрола од актуелната владејачка елита врз сите три гранки на власта. И како да ова не им беше доста на актуелната политичка елита, или по позната како „фамилијата“. За да може полесно подобро и секако подолго да владее направи најдлабоко divide et impera на општеството. Оваа поделба на наши и ваши, патриоти и предавници дојде до полн израз после оние познати демонстрации пред Државната Изборна Комисија во декември минатата година кога „фамилијата“ на чело со „хазаинот“ на државата го повика народот да ја брани нивната „победа“. Тогаш некои аналитичари и колумнисти (Зеколи мојата дребност и други) предупредивме дека во суштина тој кој ќе завладее со улицата (сфатено ова во најширока смисла на зборот) на крајот ќе биде некаков си победник односно неговите ставови и барања барем оние најсуштинските ќе бидат прифатени. Целта на сето ова е само една, како „фамилијата“ да се спаси од можни правни консеквенции кои произлегуваат од она што го слушнавме во бомбите. Не смее да се потцени дека зад „фамилијата“ и Груевски стои (сѐ уште) ВМРО-ДПМНЕ која е одлично организирана партија која им послушно членство, а и многу пари. Партија, која на себе од лукративни причини (клиентелизам) има врзано се и сешто од уметници, глумци писатели до професори аналитичари и така натаму. Државните институции и така ги има под свое веќе 10 години. Партија во која теренското работење е доведено до перфекција па така ќе видите како министер за финансии промовира нови контејнери или како хазаинот (газдата) фрли илјадници лопати пресече километри и километри ленти, односно се има впечаток дека партијата и Груевски секогаш е со народот. Токму врз таа виртуелна проекција деновиве Груевски отворено го повикува народот да биде буден и да ја брани унитарноста на државата, а со тоа опстанокот на македонскиот народ. Неговата партија, ВМРО-ДПМНЕ и народот спремни се и ќе реагираат најостро. Во суштина Груевски веќе недела дена најавува некакви насилни сценарија на СДСМ со цел да изберат претседател на Собранието а потоа и влада. А од тука, според Груевски до промена на унитарниот карактер на државата е само прашање на време, односно ете ти целосно остварување на така наречената тиранска платформа. Интересено, вакви предупредувања се засилија откако на Груевски не му поминаа „демократските“ решенија за кризата изразени преку „Патоказот“ и Манифестот“ на кои меѓународната заедница не „трзна“. Затоа тој сега на „мегдан“ го вади најсилното оружје „народот“. И што сега. Мислам дека Груевски нема да запре само со овие закани и предупредувања туку тие ќе и зголемува пред се преку притисокот од улицата односно „народот“ како што тој милува да рече.  Да потсетам. Повикувањето на „народ“ по правило е карактеристично за автократско владеење барем така покажува историјата.

Нема да ме изненади ако се случат и инциденти, прашање е само дали тие кои стојат зад нив ќе можат да ги контролираат да не прераснат во нешто многу поголемо кое може и нив да ги оддува на буништето на историјата. Опозицијата поточно СДСМ со своето водство за жал по не знам кој пат се покажа дека со своето однесување на „салонски револуционер“ не може да и парира на популистичката политика на Груевски која демек извира од народот и е во функција на негова благосостојба.

Албанците како наши сограѓани во последниве две години а посебно на последните избори барем еден дел од нив покажаа навистина политичка зрелост и која води кон вистински соживот, за граѓанско општество и одговорност за заедничка но функционална држава. Оваа политичка зрелост барем јас не ја гледам кај политичките елити на албанските партии. ДУИ односно најтесното раководство се има впечатокот дека иако ги даде потписите на Заев ама сѐ уште не се откажале од своите довчерашни тендер партнери. На пример од ДУИ не слушнавме ниту збор за манифестот на ВМРО-ДПМНЕ. Понатаму не чувме никаква реакција на заканите од Груевски дека тој заедно со народот нема да дозволи да биде избран ниту претседател на Собранието (кој треба да биде од ДУИ) а уште помалку влада ако пред тоа не се откажат од таканаречената тиранска платформа. Дали водството на ДУИ кои во последно време „темелно ги анализираат“ секој свој потез дошле сепак до заклучок дека идејата на ВМРО-ДПМНЕ за да се оди на нови избори можеби и на нив им одговара. Имено ако има нови избори ВМРО-ДПМНЕ и ДУИ кампањата ќе ја темелат исклучиво на таканаречената тиранска платформа. Парадоксално нели ама во суштина точно. ДУИ ќе ја брани и затоа ќе бара гласови од Албанците, ВМРО-ДПМНЕ ќе ја напаѓа и за да не помине ќе бара гласови од Македонците.

И сега повторно слушаме дека ни е потребен меѓународниот фактор и некакво Пржино 3 како излез од кризата. Можеби и така ќе се случи. А тоа значи дека меѓународниот фактор повторно стабилноста ја става пред демократијата. Во тој пример победникот се знае, популизмот ќе победи. И така почитувани дојдовме до крајот односно до насловот Ича прича и готова прича. Се плашам дека потоа следи крајот на државата, само прашање е кој ќе ни ја каже оваа фраза од моето детство или можеби некои ќе ја употреби оној драмски настап на Чом кога го згасна светлото во А1 телевизија…

Тодор Пендаров

Ма људи мои јели то могуќе!?

 

Ова е легендарната реченица на еден од најпознатите спортски коментатори во некогашна Југославија Младен Делиќ изречена во далечната 1983 година во телевизискиот пренос на фудбалскиот натпревар помеѓу Југославија и Бугарија. Повеќе

pendarov2000@yahoo.com