ГЛОГОВ КОЛЕЦ ЗА ОПОЗИЦИЈАТА

Да ги прашам оние кои ги правеле спотовите за здрава храна владините спин-доктори – кога зготвиле дома леблебија нивните баби, мајки, сопруги

Ми се допадна написот во „Утрински весник“ со наслов „Пратениците не менуваат месо за житарки“, во кој се гледа дека до пратениците, по се’ изгледа, се’ уште не допрела најновата кампања од проектот „Остваруваме“ овој пат посветена на здрава исхрана. Пратениците, а и ние вработените најмногу сакаме во исхраната да има месо. Во меѓувреме видов и неколку „реклами“ платени од наши пари (околу половина милион евра) кои ја покажуваат целата бесмисленост на оваа акција.
Во суштина, снимените спотови заедно со рецептите за здрава храна се само лоша копија од познатиот телевизиски канал „24 kitchen“. Само еден пример. Како здрава храна се препорачува наут, или по наше леблебија. Па така леблебијата ја варите, па потоа во блендер да се добие густа маса… па потоа правите од тоа чорба и нормално користите маслиново масло и тоа екстра вирџин ладно цедено, кое чини минимум 250 денари. Повеќе

НУТРИЦИЗАМ ИЛИ НАУКА ЗА ЗДРАВА ХРАНА

Откако ни ги средија сексуалните активности, еве сега почнува процесот на индоктринација за здрава храна

И така проектот „Остваруваме“ продолжува. Сега преку реклами, вредни околу 500 илјади евра ќе не учат да јадеме здрава храна. Машала!! Откако ни ги средија сексуалните активности, нормално помеѓу еден маж и една жена, а кои се сведуваат на раѓање на деца, (па затоа нека не изненадува како во учебниците е дефиниран поимот ејакулација) еве сега почнува процесот на индоктринација за здрава храна. Лично, заради годините и фактот дека либидото ми е во „тренд“ на опаѓање (за жал или за среќа меракот не старее), оваа кампања околу раѓањето на деца и воопшто сексуалното воспитување не ме засега. Ама здравата исхрана е секого засега. Прв предуслов за здрава исхрана е здрава човекова околина, тука мислам на чист воздух, чисти води, и секако незагадена почва. Е, ајде да ги видиме овие параметри какви се. Тешко, бидејќи или ги немаме или некој (од надлежните институции) ги крие како змија нозе, што би рекол народот. Каков е односот по ова прашање (здрава човекова околина) покажа и минатонеделната „акција“ на ДОМ за чиста околина. Одзивот, најблаго речено, беше симболичен, а не видов ниту еден министер партиски шеф или некоја друга позната „фаца“ на пример од светот на културата. Ама затоа кога е акцијата „Денот на дрвото“, зад која отворено стои Владата и која се одвива под мотото „Засади ја својата иднина“ „врие“ од министри, познати фаци од културата, а масовноста се обезбедува преку администрацијата и училишта и тоа во работен ден.
Сега една компарација со Словенија. Таму со години се одржува акција под мотото „За чиста Словенија“. А нема да верувате акцијата се одвива за викенди, а одзивот е неверојатен од 200 до 250 илјади граѓани. Значи станува збор за свест и развиена одговорност кај граѓаните стекната во еден долг процес на социјализација (воспитување) која започнува од дома во семејството.
Повеќе

ИНВЕНТИВНОСТ ЗА ГЛУПОСТИ БЕЗ ГРАНИЦИ

Што следува по дронот во Белград, ќе видиме. Во деновите пред и по извештајот на Брисел се изнагледавме скандали, па дури и смешни карантини

И така успешно ја средивме еболата. И тоа во еден типичен наш балкански трагикомичен манир. Трагичен за семејството на починатиот Британец. Додека се’ останатото што се случуваше беше најблаго речено една добро режирана фарса, во која имаше и комични сцени. Навистина беше смешно како телевизијата која „прва дознава“ правеше директен пренос од пред хотелот во кој живеел починатиот Британец, истакнувајќи дека хотелот со сите вработени и гости е во карантин.
А карантинот типично балкански. Пред хотелот два-три полицајци само во униформи. На балконот гостите во карантин весело мавтаат пред камерите, а долу некое кафуле полно со гости сеирџии. И така три дена. Ама нема повеќе да ве давам со еболата. Колегата Ризаов во понеделникот во својата редовна колумна со наслов „Нема ебола, има идиоти“ многу добро го опиша целиот овој циркус. Околу дилемата што ја поставува во колумната кој е поголем идиот, дали оние кој продуцираат вакви лаги и ја вознемируваат јавноста, а тоа им е целта, или граѓаните кои со години веруваат на вакви и илјадници други лаги. Почитуван колега, Ризаов, по се’ изгледа дека токму ние граѓаните сме поголемите идиоти и веруваме во сите овие шарени лаги кои ни се сервираат две децении. Повеќе

ЌОР-СОКАК

За жал, како и досега, власта и опозицијата повторно го читаат извештајот на ЕУ за напредокот на земјата како што ним им одговара

Ете и толку очекуваниот извештај на Европската комисија за напредокот на Македонија дојде и ние по шести пат добивме препорака за почнување на преговорите. Убеден сум дека во декември од страна на Министерскиот совет на ЕУ, повторно поради грчкото вето, од датум нема да има ниту „Д“. Односно, како што во средата пред одборот за надворешна политика на Европскиот парламент рече комесарот во заминување Филе, Македонија поради проблемот со името кој се влече две децении е доведена во ќор-сокак.
Но, во тој ќор-сокак барем едната страна се нашите внатрешни состојби. Во рамките на тие внатрешни состојби, од кои некои се влечат речиси две децении (слободата на изразувањето и положбата на медиумите, независноста на судството, меѓуетничките односи, владеењето на правото, ниската политичка култура и така натаму), сега најактуелен е бојкотот на Собранието од страна на опозицијата, односно немање ниту елементарен политички дијалог. Повеќе

ДЕМАГОШКИ БОЈКОТ НА СДСМ

Точно вели професорката Десковска дека претседателот на Собранието може кога сака да ги констатира оставките, ама точен е и фактот дека пратениците од опозицијата можеа да ги вратат платите во буџетот на државата

Како држава и како општество навистина стануваме уникатни. Имено, според најновото истражување на јавното мислење правено од ИРИ, популарноста, односно поддршката на Владата бележи благ пад во споредба со истражувањето правено веднаш по изборите. Многу од вас ќе речат што има тука уникатно? Ништо, ама уникатен е фактот дека во исто време стрмо паѓа рејтингот на опозицијата, односно на СДСМ. Така, според ова истражување ако утре би имало избори, СДСМ би освоил помалку пратенички места од последните парламентарни избори (34) кои не ги признаваат. Дури, што е за прв пат кај нас, СДСМ има понизок рејтинг од ДУИ. Нормално, за наши услови и нашето ниво на политичка култура СДСМ веднаш истакна дека не ги признава резултатите и бројките од ова истражување, иако тоа го први ИРИ (Меѓународен републикански институт). Значи, пак Американците, односно нашите најголеми сојузници, како што знаат често пати да истакнат токму највисоките претставници на СДСМ. Повеќе

pendarov2000@yahoo.com